ॐ
वं. राष्ट्रसंत श्रीतुकडोजी महाराज - विरचित
आत्मप्रभाव
(ओवीबद्ध ग्रंथ)
अध्याय पहिला
(श्रीगणेश - शारदा स्तवन)
जयजयाची श्रीगणराया ! ओंकाररुप तुझी काया ।
रिद्धी-सिद्धिंच्या राजया । मंगलमूर्ती ॥१॥
सर्व गणांचा गणराज । सर्व गुणांचा महाराज ।
निर्गुण सिंहासनी तुज । वंदितो मी पुनःपुन्हा ॥२॥
अकार, उकार, मकार । अर्धमात्रा ती निराकार ।
स्थूल-सूक्ष्म, विश्वाकार । महाकारण तूंचि ॥३॥
तूंचि मूळ निरंजन । परात्पर परब्रह्म पूर्ण ।
तुझे ठायी जे स्फुरण । तींच देवी शारदा ॥४॥
परा-पश्यंति-मध्यमा-वैखरी । नवनवे रुप तींच धरी ।
पंचतत्वांचा वीणा करी । षड्चक्र खुंट्या तयाला ॥५॥
ओऽहं-सोऽहं अजपा स्वर । सुरु राहे निरंतर ।
बावन्न मातृका सुंदर । उमटती बरव्या ॥६॥
चौदा विद्या, चौसष्ट कला । ज्ञान-विज्ञान रंग भरला ।
नाना भाषा ग्रंथ-सोहळा । त्यांतचि उपजे ॥७॥
म्हणोनि माते सरस्वती ! । तुजला नमन पुढत-पुढती ।
देई ग्रंथ-लेखना मती । तूंचि स्फूर्तिदेवते ! ॥८॥
बैसोनि माझिया जिव्हाग्री । लोटी अमृताची झारी ।
आत्मप्रभाव-माधुरी । मिळू दे सर्वा ॥९॥
माते ! तुझिया कृपेविण । मज बालका कैचे ज्ञान ? ।
हंसवाहिनी तूंचि पूर्ण । ब्रह्मवीणा वाजविसी ॥१०॥
मी नाही केले विद्याध्ययन । परि तुझी लीला विलक्षण ।
मुकाही बोले वेदवचन । चिंता मजला कासयाची ? ॥११॥
तुझा वळता कृपाकटाक्ष । घडे आपुली आपणा साक्ष ।
साहित्यकलाहि प्रत्यक्ष । अवतरे तेथें ॥१२॥
म्हणोनि माते ! तुज प्रार्थना । स्फूर्ति देई माझिया मना ।
शब्दोशब्दी उमटवी खुणा । निजबोधाच्या ॥१३॥
स्वरुपाची अनुभूती । तीच तूं देवी सरस्वती ! ।
तुजवाचूनि कवणाप्रती । शरण रिघावे ? ॥१४॥
तुजसी येवो जाता शरण । आड येई जरा-विघ्न ।
करिता गणाधीशाचे स्मरण । निस्तरे सकळ ॥१५॥
विघ्नहर्ता गणनायक । सर्वतोपरी मंगलदायक ।
जेथे नुरे द्वैताचीच भाक । मग विघ्न ते कैचे ? ॥१६॥
मनाचा चंद्रमा कलंकित । तोचि विघ्नरुप येथ ।
स्मरता गणेशु मनातीत । बाधा उरेना ॥१७॥
स्वामी ! तुझे जे स्मरण । ते विलया ने विस्मरण ।
मग द्वैताचे नुरे भान । जीवन धन्य होतसे ॥१८॥
तुझे पावता वरदान । सर्व सुखे पायी लीन ।
जें जें करावे तें तें पूर्ण । होय शुभ फलदायी ॥१९॥
जिकडे पाहावे तयाठायी । स्वरुपावीण दुजे नाही ।
जें जें बोलावे तें तें होई । कल्याणमय ॥२०॥
जें जें काही करु जावे । तेणें विश्व सुखी व्हावे ।
ऐसे प्रसादफळ बरवें । प्रभुजी ! तुझे ॥२१॥
म्हणोनि मी अनन्य शरण । द्यावी आपुली कृपा पूर्ण ।
केले गणेश-शारदा स्तवन । याचि भावे ॥२२॥
इतिश्री आत्मप्रभाव ग्रंथ । वेदान्तसार संमत ।
तुकड्यादास विरचित । मंगलाचरण पूर्ण हे ॥२३॥
॥ सद्गुरुनाथ महाराज की जय ॥