अमुचा देश सुखाची खाण ।
यासी यश देवो भगवान ॥धृ.॥
धनधान्याने हो भरपुर हा । गोवंशाने हो सुंदर हा ।
वाढो शेति शक्ति खदान ॥ यासी यश... ॥१॥
वीर तरुण हो सर्व शिपायी । तत्पर देशासाठि सदाही ।
रक्षो राष्ट्रपित्याचे दान ॥ यासी यश... ॥२॥
राष्ट्रध्वज हा प्रीय तिरंगा । अखंड राही जैसी गंगा ।
वाढो सत्य-अहिंसा मान ॥ यासी यश... ॥३॥
हिंदराष्ट्र हे अखंड नांदो । अखिल विश्वही यासचि वंदो ।
सगळ्या धर्माचा जिवप्राण ॥ यासी यश... ॥४॥
जातीभेद मिटो हा सारा । मानवतेने हो अति प्यारा ।
तुकड्यादास करी गुणगान ॥ यासी यश... ॥५॥