अमुचा सर्वांचा तूच हरी ।
अन्य कुणाचे ध्यान, करावे सांग तरी ? ॥धृ.॥
सर्व घटी अणि सर्व मठी तू, व्यापक पंढरिराणा ।
असे असुनिया भक्तासाठी घे अवतार सगुणा !
अनुभव सगळ्यांना हा येतो, मग कोणाचे पाय,
धरावे सांग तरी ॥१॥
जेथे भक्त तुझे सत्कार्यी रमती जिव लावूनी ।
तेथे तू प्रगटलास म्हणती मायारुप दावूनी ॥
जैसे प्रल्हादा रुप दावी, का इतरांचे नाम,
भजावे सांग तरी ? ॥२॥
अमुचे सुख-दुख तुझ्याच पायी, सांगुनि मन रमवावे ।
तुकड्यादास म्हणे जगदीशा ! व्रत ऐसे टिकवावे ॥
नाही का म्हणशी ? कोणाला-अंतकाळि गुरुमाय,
म्हणावे सांग तरी ? ॥३॥