(चाल : देव बाजारचा भाजिपाला...)
अंगि नाही ज्ञान,म्हणे साधु मला मान ।
साधु नावानं साधु होत नाहि हो ऽ ॥
साधु हॉटेलचा चहा-पाणि नाही हो ! ॥धृ.॥
जंगलच्या अस्वलिला मोठ्या-मोठ्या जटा ।
पारधी लंगोटीनं त्यागि दिसे मोठा ॥
कुत्र्याच्या अंगावर भगव्याची छटा ।
गाढवाच्या अंगी नाहि भस्माचा तोटा ॥
साधु हॉटेलचा चहा-पाणि नाहि हो ! ॥१॥
साधूचं साधुत्व नाही पंथात ।
साधूचं साधुत्व नाही तीर्थात ॥
साधूचं साधुत्व नाही वर्णात ।
जाती-पातित नाही साधूची मात ॥
साधु हॉटेलचा चहा-पाणि नाही हो ! ॥२॥
सत्याचरणाविण साधुत्व नाही ।
आत्म - ज्ञानाविण साधुत्व नाही ॥
प्रभू - भजनाविण साधुत्व नाही ।
तुकड्यादास म्हणे, ऐका हि ग्वाही ॥
साधु हॉटेलचा चहा-पाणि नाही हो ! ॥३॥