अनुभवियांचा संग मिळाया,
जिव झुरे माझा ॥ प्रभू रे ! ॥धृ.॥
कोठुनि हुडकावी ही रत्ने ?
केली असतिल कुणी प्रयत्ने ॥
जाउनी धरु मी चरण तयांचे ।
सांगा यदुराजा ? ॥ प्रभू रे ! ॥१॥
जिकडे-तिकडे परोक्ष दिसतो ।
अपरोक्षाचा ठावचि नसतो ॥
म्हणोनि वळतो निश्चय मनि या ।
वाटतसे बोझा ! ॥ प्रभू रे ! ॥२॥
आपणची हे काहि करावे ।
तरि मग मार्गी अडुनि राहावे ॥
सद्गुरु वाचुनि सोय मिळेना ।
चुकेल अंदाजा ! ॥ प्रभू रे ! ॥३॥
धडपड ही सगळी जीवनाची ।
उरली थोडी वेळ वयाची ॥
तुकड्यादास म्हणे ऐकाहो !
ऐका गुरु - राजा ! ॥ प्रभू रे ! ॥४॥