(चाल : क्यों नहीं देते हो दर्शन...)
अंतरी इच्छा अशी, वाहते सदा रे माधवा ।
कोण पुरवी आस ही, तुज वाचुनीया केशवा ? ॥धृ.॥
सृष्टि ही नांदो सुखे, झणि सौख्य इहपर भोगण्या ।
द्रोह ना वाढो कधी, जीवा - जिवाशी राघवा ! ॥१॥
निंदका सद्बुध्दि हो, हो पापिया सुमती सदा ।
ऐक्य हो राजा-प्रजा, साधू जसे जीवा - शिवा ॥२॥
सृष्टिसौंदर्य रमो, नांदो सदा कांती वनी ।
वीरपुत्रा तेज हो, लढण्या रणी भासो नवा ॥३॥
नष्ट हो ही दैन्यता, बलहीनता, दुर्भाग्यता ।
निर्जीवता, परकी सत्ता, झळको स्वातंत्र्याचा दिवा ॥४॥
काय करणे याजसाठी ? बुद्धि दे दीन पामरा ।
दास तुकड्या मागतो, दे भीक जीवीच्या जिवा ! ॥५॥