(चाल : परधानि गेला दर्या पार...)
अंधारी जाऊ नका कोणी ॥धृ.॥
भरली गंगा खळखळ वाहे ।
त्यामधी जीव क्रुर आति आहे ॥
ओढूनी नेई पाणि ॥ अंधारी जाऊ... ॥१॥
अंधाऱ्या ह्या रात्री कशाला ।
घेऊनि आशा मार्गि निघाला ? ॥
राहति चोर टपोनी ॥ अंधारी जाऊ... ॥२॥
वनि गर्जत वटवाघुळ फिरती ।
व्याघ्र भयंकर गुरगुर करती ॥
हरतिल प्राण तुटोनी ॥ अंधारी जाऊ... ॥३॥
अति सळसळती साप विषारे ।
काम-क्रोध-मद नांव तया रे ॥
नेतिल शांति लुटोनी ॥ अंधारी जाऊ... ॥४॥
तुकड्यादास म्हणे घ्या हाती ।
ज्ञानप्रकाश चढा मग वरती ॥
करा भजन मनि ध्यानि ॥ अंधारी जाऊ... ॥५॥