किति उरली वेळ आता

(चाल : वनवासी राम माझा...)

किति उरली वेळ आता,

देवा ! यावया तुम्हा ? ॥धृ.॥

धर्मभ्रष्ट नयनी दिसती वाढली जनी या कुमती ।

धर्म- व्रत न लागे हाती, पहावया तुम्हा ॥१॥

 

साधू, संत छळणी आले, असुरि राज्य सारे गिळिले ।

 श्रेष्ठ अहंतेने चळले, पावले भ्रमा ॥२॥

 

 मातृभूमि रुसली सगळी, तृप्तिसि ना धान्या उफळी ।

गो- पशुसी देताति बळी, जाहली सिमा ॥३॥

 

शांतविण्या तुकड्यादासा, आठवावयासी श्वासा ।

उरलि एक तुमची आशा प्रभू ! नमोनमा ! ॥४॥