अघटित अशी घडली घटना

(चाल : जीवन में पिया तेरा साथ रहे...)

 

अघटित अशी घडली घटना,
अति लख्ख प्रकाश दिसे नयना ॥धृ.॥ 

 
किती रंग अनंत उफाळित हे,
लहरावत जणुं सुख - सागर तो ।
एकावरी वरवर चक्र दिसे,
जणु प्राण उडे गमला गगना ! ॥१॥ 

 
कुणी मंजुळ वीणा वाजवितो,
या जिवभावाला मोहवितो ।
जणु बांसरिचा प्रति येत ध्वनी,
आदेश करी मग निर्भय ना ! ॥२॥

 
कुणि अमृत पान करा म्हणती,
देउनिया धारची धार जशी ।
ही गोड रुची किति सांग तुम्हा ?
मन उन्मन होत पिता , पल ना ! ॥३॥

 
षड्चक्र खडाखड जागृत हे,
त्या कुंडलिनीसी घे खटके ।
तुकड्या म्हणे , गुरुनी वरद् दिला,
त्या रात्रिच हा दिसला नयना ! ॥४॥