(चाल : अगर है शौक मिलने का...)
करा काही कृपा आता, किती पाहता मती माझी ?
पुरेना मी कसवटीला, कळेना का तुम्हाला जी ! ॥धृ.॥
मनाची धाव ही थोडी, पुरेना ध्यान करण्याला ।
भरारी घेत विषयाची, सदा देई दगाबाजी ॥१॥
मिळेना संगती कोठे, कुणीतरी बोध करण्याला ।
लुबाडे - संत हे फिरती, जया द्रव्याचि ये हाजी ॥२॥
भला संसार- ओढा हा, मिळेना भीक भक्तीला ।
दान हे स्वार्थि - लोकांचे, करी बुध्दि सदा पाजी ॥३॥
उणे जरि कर्म हे माझे, भरा तरि सहज लीलेने ।
फजीती ही पुरी वाटे, बना तुकड्याचिये गर्जी ॥४॥