अमरपुरीची वाट उघडली, या रे या सगळे जाऊ ।
समुदायाने करूनि प्रार्थना, विश्वचालकासी गाऊ ॥धृ.॥
मानवधर्म श्रेष्ठ सकळाहुनि, त्याची शिकवण मिळे तिथे ।
नीचउच्चता सोडुनि सगळे, बसले दिसती एक मते ॥१॥
सर्व जनांना वाव मिळे, अपुलाले भाषण बोलाया ।
सध्दर्माची शिकवण सगळी, मिळे गड्या ! यारे या ॥२॥
माणुसकीचा धडा मिळे, अणि दुर्गुण हे पळती सगळे ।
लाज वाटते पापवृत्तिला, धर्मभाव अंगी उसळे ॥३॥
विश्वचालकाच्या कार्याचे, वर्म कळे जाता बसता ।
रंग लागतो अंतरंगिचा, भजन तिथे गाता ठसता ॥४॥
खोवु नका रे संधी असली, करा प्रार्थना चला चला ।
तुकड्यादास म्हणे या लोकी, हाच मार्ग सकळास भला ॥५॥